Prishtinë, 6 prill - Procedura e konfiskimit të dy kamionëve me zhavorr,  të cilët janë ndalur nga pjestarët e  Policisë së Kosovës në luginën e Lumbardhit në Prizren, është kryer sot duke i dërguar të njejtit bashkë me zhavorr në Smerkovnicë.

Ky aksion është realizuar në kuadër të implementimit të vendimit Nr.2/46 të datës 02 Nëntor 2011 për ndalimin e eksploatimit të rërës dhe zhavorit në shtretërit e lumenjëve, brigjet dhe hapësirat përreth lumenjëve.

Ndalimi dhe konfiskimi i këtyre kamionëve është bërë në bashkëpunim me inspektorët e Komisionit të Pavarur për Miniera dhe Minerale, MMPH-së, komunës së Prizrenit dhe me asistimin e policies së Kosovës.

Konfskimi i këtyre dy kamionëve të markës Mercedes të kompanisë “Dili Commerce“ në Prizren, paraqet aksionin e radhës në drejtim të implementimit të këtij vendimi. Deri më tani, janë konfiskuar tre kamionë dhe një eskavator, që të gjithë nga operatorë ilegalë.

Prandaj, ua rikujtojmë të gjithë operuesëve ilegalë të rërës dhe zhavorit se ky aksion do të vazhdojë pandërprerë deri në implementimin e plotë të vendimit.