Prishtinë, 20 qershor - Ministria e Mjedisit dhe Planifikimit Hapësinor ka ushtruar kallëzim pendal kundër NTP “Vëllezërit Morina”, eksploatues të rërës dhe zhavorit nga fshati Xërxë i Komunës së Rahovecit.

Gjatë inspektimeve rutinore nga inspektorët e MMPH është konkluduar se operatori nuk ka zbatuar vendimin e Qeverisë së Kosovës për ndalimin e aktiviteteve që kanë të bëjnë me eksploatimin, seperimin e rërës dhe zhavorit në lumenjtë dhe hapësirat përreth lumenjëve në gjithë territorin e Kosovës.

Gjatë vizitës inspektuese, ku të pranishëm ishin edhe inspektorët nga Komisioni i Pavarur për Miniera dhe Minerale, është kuptuar se operatori nuk posedonte licencën e punës nga KPMM.

Për më tepër, kishte refuzuar të japë informacion se nga ku është duke e marrë rërën të cilën më pas e përpunonte në seperatorin e tij.

Sipas inspektorëve nga MMPH ky operator përveç që aktivitetin e tij e ushtron në mënyrë ilegale, pa licencë nga MMPH dhe KPMM, gjithashtu ka shkaktuar edhe degradim të resurseve natyrore të Kosovës.

Ministria e Mjedisit u bën thirrje të gjithë operatorëve se vendimi i Qeverisë së Kosovës për ndalimin e aktiviteteve që kanë të bëjnë me eksploatimin, seperimin e rërës dhe zhavorit në lumenjtë dhe hapësirat përreth lumenjëve në gjithë territorin e Kosovës dhe që ndalon degradimin e pariparueshëm të shtretërve dhe brigjeve të lumenjëve është në fuqi.

Secili operator që nuk posedon licencë nga KPMM dhe MMPH konsiderohet ilegal dhe ndaj tyre do të inicohen kallëzime penale.