Mitrovicë, 17 prill - Kryetari i Lidhjes Demokratike të Kosovës, dr. Isa Mustafa sot qëndroi në Kompleksin “Trepça” në Mitrovicë, ku u takua me drejtuesit dhe me minatorët e “Trepçës”.

Kryetari Mustafa vizitoi edhe minierën e këtij kompleksi dhe aty u njoftua për kushtet e punës së minatorëve. Me këtë rast, ai vlerësoi lart rolin e minatorëve gjatë viteve më të vështira të Kosovës, duke theksuar se “kanë qenë minatorët ata që kanë bërë kthesën e madhe të Kosovës drejt shtetit të pavarur”.

Po ashtu, Kryetari Mustafa theksoi se “Trepça” meriton dhe do të ketë mbështetjen e plotë për t’i ngritur kapacitetet dhe për t’u bërë burim i zhvillimit ekonomik të mbarë Kosovës.

LDK-ja, vijoi ai, e ka nxitur dhe e ka përkrahur në Kuvendin e Kosovës ndryshimin e Ligjit për ndërmarrjet publike, për ta hequr “Trepçën” nga lista e ndërmarrjeve që menaxhohen nga AKP-ja, për arsye se “Trepça” është resurs kombëtar i Kosovës dhe nuk guxon të rrezikohet nga privatizimi.