Rryma mund të shtrenjtohet sërish nga muaji prill
KEK-u kishte paralajmëruar se gjatë muajit dhjetor do t’i kthejë në punë njësitë A4 dhe A5 të termocentralit “Kosova A”, që u paaftësuan në shpërthimin e 6 qershorit.
Këto njësi ende janë jashtë funksionit. Gjatë këtij muaji sa është vonuar KEK-u për t’i kthyer në punë dy njësitë e A-së, KEDS-i ka importuar energji elektrike për të mbuluar mungesën e energjisë elektrike vendëse që ka ardhur për faj të KEK-ut.
Në muajin prill, kur pritet të vendoset për tarifat e energjisë elektrike, ZRRE-ja do t’i marrë për shqyrtim të gjitha shpenzimet e të licencuarave për t’i barazuar me ato që ishin lejuar në shtatorin e vitit 2014, kur për herë të fundit janë shqyrtuar tarifat e energjisë elektrike, përcjell koha.net.
Njëra prej kostove që i njihet KEDS-it, tash KESCO si furnizues publik, është edhe importi i energjisë elektrike.
/Koha Ditore/
