Prishtinë, 11 nëntor - Konsorciumi Kosovar i Shoqërisë Civile për Zhvillim të Qëndrueshëm (KOSID), kundërshton procesin plotësisht të mbyllur të negociatave të Ministrit Blerand Stavileci për ndërtimin e termocentralit ‘Kosova e Re’ me kompaninë Contour Global. Negocimi i 1.4 miliardë euro të qytetarëve të Kosovës pa miratimin e Kuvendit të Kosovës dhe mungesa e transparencës për një vlerë kaq të madhe paraqet rrezik serioz për kredibilitetin dhe ligjshmërinë e këtij procesi.

Procesi ka mungesë të plotë transparence dhe informacioni për opinion publik! Që në fillim, për këtë projekt nuk u respektuan standardet procedurale duke shkaktuar një mori shkeljesh ligjore. Hapja e ofertave për Projektin ‘Kosova e Re’ u bë në fshehtësi të plotë dhe pa prezencën e mediave. Sipas lajmit të djeshëm të Qeverisë së Kosovës se është arritur marrëveshja për pikat negociuese me kompaninë Contour Global, asnjëherë opinioni publik nuk është informuar për atë se çfarë është duke u negociuar dhe se çfarë marrëveshje është arritur.

Qeveria e Kosovës ka proceduar me tenderin duke bërë shkelje te legjislacionit të Kosovës, përkatësisht të Ligjit për Prokurim Publik, pasi tenderi për Termocentralin ‘Kosovën e Re’ ka vazhduar me vetëm një ofertues të vetëm, që është Contour Global.

Gjithë zhvillimet rreth këtij projekti janë bërë në një mjegulli të madhe, duke mos informuar opinionin për kushtet e investimit dhe detajet e projektit, e në mënyrë specifike për çështjet shumë të rëndësishme për Kosovën, si: Sa do të jetë kapaciteti i termocentralit? Sa është kostoja totale e investimit? Kush do të bëjë financimin e ndërtimit të termocentralit, Qeveria e Kosovës apo kompania Contour Global? Për sa vite do të bëhet kthimi i investimit? Teknologjia e cila do të përdoret në këtë termocentral?, etj. Gjitha këto tejet të rëndësishme për ta vlerësuar çmimin e energjisë elektrike e cila do të paguhet nga qytetarët e Kosovës.

Sipas Bankës Botërore, e cila duket te jete e përfshirë ne këto negociata, çmimi i energjisë elektrike pas ndërtimit të Termocentralit ‘Kosova e Re’ do të ketë rritje deri në 300% te çmimit të energjisë elektrike. Një gjë e tille do të jetë e papërballueshme për qytetarët e Kosovës, për të cilët edhe sot është barrë tejet e madhe çmimi i energjisë elektrike i cili ju faturohet. Një gjë të tillë e dëshmon edhe peticioni i qytetarëve kundër shtrenjtimit të energjisë elektrike i cili u nënshkrua nga 33,000 qytetarë.