Sofje, 13 prill - Qeveria bullgare miratoi dje planet paraprake për ndërtimin e një reaktori të ri në centralin bërthamor "Kozloduj" me fuqi 1.000 megavat, njoftuan burime të ndryshme.

"Qeveria vendosi që projektin për ndërtimin e një reaktori të ri në centralin bërthamor 'Kozloduj' ta hapë për investime", deklaroi Ministri bullgar i Financave, Simeon Gjankov.

Gjankov vuri në dukje se reaktori do të ndërtohet në bazë të parimeve të tregut, që do të thotë pa para të qeverisë ose garanci shtetërore.

Kompania ruse "Atomstrojeksport" tashmë ka filluar ndërtimin e këtij reaktori si pjesë e projektit për ndërtimin e centralit të ri bërthamor në Belene, në veri të Bullgarisë.

Reaktori i ri me fuqi 1.000 megavat do t'i bashkangjitet dy njësive që punojnë në "Kozloduj", por që duhet të mbyllen në vitin 2017 dhe 2019.