OSBE dhe MPB organizojnë konferencë për parandalimin e trafikimit me njerëz
Prishtinë, 9 mars - Misioni i OSBE-së në Kosovë, së bashku me Zyrën e Përfaqësuesit Special të OSBE-së për Luftimin e Trafikimit me Njerëz dhe Ministrinë e Punëve të Brendshme, do të organizojnë nesër një konferencë në Prishtinë mbi rolin e prokurimit publik në parandalimin e trafikimit me njerëz për shfrytëzim në punë në zinxhirët e furnizimit.
Trafikimi me njerëz është bërë në një problematikë serioze e të drejtave të njeriut, duke qenë se ekonomitë e sotme karakterizohen nga procese komplekse të prokurimit, të cilat rezultojnë në rritjen e rasteve ku kompanitë shmangin rregullat dhe rregulloret gjatë punësimit të personelit ose prodhimit të produkteve të tyre.
Në këtë ngjarje do të mblidhen përfaqësues të qeverisë, odave të tregtisë, sindikatave, shoqatave të punëdhënësve, institucioneve të të drejtave të njeriut, botës akademike, inspektorëve të punës, organizatave të shoqërisë civile dhe partnerëve të tjerë privatë dhe publikë në parandalimin dhe luftimin e trafikimit me njerëz për qëllime të shfrytëzimit për punë në zinxhirët e furnizimit.
Synimi është që hisedarët dhe zyrtarët përkatës të njoftohen dhe përditësohen me risitë në zhvillimet e fundit legjislative dhe të politikave në këtë fushë dhe mënyrat për të forcuar parandalimin dhe luftimin e trafikimit me njerëz në zinxhirët e furnizimit.
Fjalimet hyrëse në Konferencë do t’i mbajnë Ambasadori Michael Davenport, Shef i Misionit të OSBE-së në Kosovë dhe Blerim Gashani, Zëvendësministër i Punëve të Brendshme dhe Koordinator Kundër Trafikimit.
