29 Mars 2023

OBSH: Evropa është tani epiqendra e pandemisë COVID-19

Gjenevë, 5 nëntor - Drejtori rajonal i Organizatës Botërore të Shëndetësisë për Evropën, Hans Kluge tha të enjten se ky kontinent është tani epiqendra e pandemisë COVID-19, me 59 për qind të të gjitha rasteve në shkallë globale.

Në një konferencë virtuale shtypi nga Kopenhaga, zoti Kluge tha se ritmi aktual i transmetimit të virusit në 53 vendet e rajonit është një shqetësim i madh. Ai tha se rastet e reja po i afrohen niveleve rekord dhe se kjo i atribuohet variantit delta të koronavirusit.

Zoti Kluge tha se të dhënat e fundit të OBSH-së tregojnë se rastet e shtrimeve në spital në kontinent janë rritur më shumë se dyfish për një javë.

Drejtori rajonal i organizatës tha se zyrtarët po shohin prirje të rritjes së rasteve në të gjitha grupmoshat, por se rritja e shpejtë mes së moshuarve është shqetësimi më i madh. Ai tha se kjo ka sjellë si rezultat më shumë raste të rënda dhe vdekje, me 75 për qind të vdekjeve mes personave të moshës 65 vjeç e lart.

Kluge tha se një parashikim nga një burim i besueshëm tregon se me ritmin aktual, Evropa mund të ketë gjysmë milioni vdekje të tjera nga COVID-19 deri në 1 shkurt.

Kluge përmendi normat e pabarabarta të vaksinimit dhe lehtësimin e masave shëndetësore publike dhe sociale në të gjithë rajonin si shkaqe për rritjen.

Megjithëse janë shpërndarë një miliard doza vaksinash, në Evropë, vetëm 47 përqind e popullsisë totale është plotësisht e vaksinuar. Ai thotë se në tetë vende, të paktën 70 për qind e njerëzve janë vaksinuar plotësisht. Zoti Kluge vëren se norma mbetet nën 10 përqind në dy vende të tjera.

Zyrtari i OBSH-së inkurajoi vendet me norma të ulëta vaksinimi që të përshpejtojnë vaksinimin, veçanërisht midis grupeve me përparësi siç janë të moshuarit. Ai u kërkoi vendeve me shkallë të lartë vaksinimi dhe rezerva të shumta, t’i ndajnë ato me vendet që nuk e kanë një mundësi të tillë.

Ai tha gjithashtu se vaksinat janë më efektive kur përdoren me masa të tjera parandaluese, si distancimi fizik dhe mbajtja e maskave. Zoti Kluge tha se nëse rajoni arrin në një përdorim universal të maskave, mund të shpëtohen 188,000 jetë nga tani deri në shkurt.

"Ne duhet të ndryshojmë taktikat tona, duke kaluar nga kundërpërgjigjia ndaj rritjes" së rasteve të COVID-19 tek "parandalimi i tyre", tha zoti Kluge.

Kalendari

Ngjarjet e datës 29 mars 2023

- Komisioni për Ekonomi, Industri, Ndërmarrësi dhe Tregti shqyrton ndryshimin dhe plotësimin e Ligjit për mbrojtjen e konsumatorit. (Kuvendi i Kosovës, salla N506, ora 10:00)

- Komisioni për Mbikëqyrjen e Agjencisë së Kosovës për Inteligjencë diskuton rreth çështjeve vijuese nga fushëveprimi i Komisionit. (Kuvendi, salla N302, ora 10:00)

- Qendra e Kosovës për Eksport organizon ngjarjen “Rritja e eksportit përmes platformës KoEx”. (Hotel Sirius, ora  10:00)

- Komisioni për Administratë Publike, Pushtet Lokal, Media dhe Zhvillim Rajonal shqyrton ndryshimin dhe plotësimin e ligjeve që kanë të bëjnë me racionalizimin dhe vendosjen e vijave llogaridhënëse të Agjencive Ekzekutive. (Kuvendi, salla N10, ora 11:00)

- Komisioni për të Drejtat dhe Interesat e Komuniteteve dhe Kthim shqyrton Projektligjin për Prokurorin e Shtetit si dhe ndryshimin dhe plotësimin e Ligjit për trajtimin e ndërtimeve pa leje. (Kuvendi, salla N303, ora 11:00)

- Do të bëhet nënshkrimi i Memorandumit të Bashkëpunimit trepalësh mes Ministrisë së Kulturës, Rinisë dhe Sportit, Ministrisë së Mbrojtjes dhe Federatës së Xhudos të Kosovës. (Qendra Nacionale të Xhudos në Pejë, ora 11:00)

- Promovohet romani “Duke ndjekur fluturat” i autores Hana Hoxha, i cili ka si fabulë edukimin e nxënësve/fëmijëve për rolin e policisë në sigurinë e tyre. (Biblioteka Kombëtare, ora 12:00)

- Bëhet inaugurimi i punëtorisë së Floktarisë në Qendrën e Kompetencës “Shtjefën Gjeçovi”, e cila do të shërbejë për zbatimin e mësimit dual ku merr pjesë edhe ministrja e Arsimit, Arbërie Nagavci. (Shtjefën Gjeçovi në Prishtinë, ora 13:00)