Prishtinë, 14 prill - Institucioni i Avokatit të Popullit (IAP) lanson sot raportin me rekomandime Ex Officio nr. 577/2021, përkitazi me “Të drejtat në shëndetin seksual dhe riprodhues.

Ky Raport, është rezultat i një hetimi të përgjithshëm përkitazi me të drejtat në shëndetin seksual dhe riprodhues dhe ka pasur për bazë dëshmi të drejtpërdrejta nga gra/vajza, që potencialisht u janë cenuar të drejta që drejtpërdrejtë apo tërthorazi lidhen me aspektet që ka vënë në fokus hetimi në fjalë.

Prezantimi në publik i këtij Raporti, tashmë të adresuar, ofron mundësinë e bashkëbisedimit lidhur me të gjeturat dhe konkludimet, si dhe rekomandimet e Avokatit të Popullit dhe zbatimin e tyre nga autoritetet përgjegjëse.  

Gjatë këtij lansimi do të bisedohet për të gjeturat e këtij hetimi në lidhje me të drejtat e njeriut si, i) Qasjen në informata dhe në shërbime në kontracepsion; ii) Qasjen në abort dhe në kujdesin pas abortit; iii) dhe Kujdesin për shëndetin e nënës.
 
Hetimi i përgjithshëm për të drejtat në shëndetin seksual dhe riprodhues, si dhe lansimi në publik i Raportit me rekomandime, është mbështetur nga Fondi për Popullsi i Kombeve të Bashkuara-UNFPA, Zyra në Kosovë.