Universiteti i Columbias mbështet Kosovën në implementimin e Strategjisë së Energjisë
Prishtinë, 13 mars - Ministrja e Ekonomisë, Artane Rizvanolli sot ka nënshkruar Memorandum të Bashkëpunimit me Universitetin e Columbias në New York të përfaqësuar nga Profesori Jenik Radon i cili specializon në menaxhim strategjik dhe të riskut, sovranitet dhe të drejta të njeriut, veçanërisht mjedisore si dhe transparencë.
Përmes Memorandumit të nënshkruar sot, Universiteti i Columbias do të mbështesë Ministrinë e Ekonomisë në implementimin e suksesshëm të Strategjisë së Energjisë 2022 – 2031 përmes studimeve e hulumtimeve akademike, përfshirë intervista e takime në terren. Dy pika të fokusit të hulumtimit e raportit të tyre do të jenë zhvillimi i skemave konkurruese për integrim të burimeve të ripërtërishme në Kosovë si dhe skemave mbështetëse për rritje të efiçiencës së energjisë.
Gjatë nënshkrimit të Memorandumit të Bashkëpunimit, Ministrja Rizvanolli është shprehur se si politikë-bërëse që beson në politikë-bërje të bazuar në fakte, është e rëndësishme që të kemi sa më shumë hulumtime që është e mundur mbi çështjet që i trajtojmë dhe që do të shfrytëzojmë në maksimum hulumtimin nga Universitetit Columbia.
Profesori Radon ka shtuar që; “mezi presim të kemi një bashkëpunim të vazhdueshëm me ju [Qeverinë e Kosovës], e jo vetëm një bashkëpunim të njëhershëm. Ne e kuptojmë që puna që jemi duke bërë është më e rëndësishme se kurrë për të kontribuar së bashku në zhvillimin e shtetit tuaj.”
Aktualisht, grupi i studentëve janë duke zhvilluar takime me përfaqësues të Ministrisë së Ekonomisë si dhe me të gjithë akterët relevantë për t’u informuar dhe mbledhur informatat e nevojshme për të zhvilluar hulumtimin e studimin e tyre.
