31 Maj 2023

Universiteti “Isa Boletini” në Mitrovicë, riakreditohet për periudhën 3 -vjeçare

Prishtinë, 28 mars - Në mbledhjen e Këshillit Shtetëror për Cilësi (KSHC), të mbajtur të martën (28 mars 2023),  është miratuar raporti i ekspertëve ndërkombëtarë për riakreditimin e Universitetit “Isa Boletini” në Mitrovicë (UIBM).

Miratimi i vendimit për riakreditimin e UMIB për periudhën 3 - vjeçare (2023 – 2026) është konfirmuar nga Agjencia e Kosovës për Akreditim (AKA).

Lajmi për riakreditim është mirëpritur nga të gjitha strukturat e UIBM. Rektori prof.dr. Alush Musaj, tha se kjo është një ditë e gëzuar meqë është punuar shumë që UIBM të konsolidohet dhe të kalojë nëpër proceset e akreditimeve pa ndonjë problem.

Me këtë rast, ai shprehu respektin për angazhimin e të gjitha strukturave që kanë qenë të përfshira në procesin e riakreditimit institucional.

“Dua të falënderoj dhe uroj secilin që ka qenë pjesë e procesit dhe që është angazhuar që UIBM të dal sa më mirë, duke filluar nga Këshilli Drejtues, Senati, prorektorët, dekanët, stafi akademik, administrata, studentët dhe drejtuesit e kompanive publike dhe private, organizatat vendore dhe ndërkombëtare, që kanë qenë vazhdimisht me ne”, tha rektori Musaj.

Ai gjithashtu ka vlerësuar lartë qasjen korrekte dhe profesionale të drejtorit të Agjencisë së Kosovës për Akreditim, Naim Gashi, si dhe gjithë zyrtarëve të AKA – së. “Ka qenë një proces i organizuar jashtëzakonisht mirë dhe me klimë pozitive”, tha ai.

Në kuadër të UIBM funksionojnë gjashtë fakultete me 20 programe të akredituara në nivelin bachelor dhe master.
    
 

Kalendari

Ngjarjet e datës 31 maj 2023

- Zyra Rajonale për Bashkëpunim Rinor RYCO në partneritet me Asociacionin e Gazetarëve të Kosovës dhe Deutsche Welle, mbajnë konferencën përmbyllëse të ciklit të dytë të programit “Transmetuesit e Paqes: Fuqizimi i gazetarëve të rinj si raportues të paqes”. (Salla e Konferencave “Orion”, ora 9:30)

- Komisioni për Shëndetësi dhe Mirëqenie Sociale shqyrton Projektëligjin për parandalimin dhe kontrollin e sëmundjeve ngjitëse. (Ndërtesa e Kuvendit, salla N303, ora 10:00)

- Instituti Kombëtar i Shëndetësisë Publike shënon Ditën Botërore pa Duhan me moton “Ne kemi nevojë për ushqim, jo për duhan”. (Ndërtesa e Institutit, ora 10:00)

- Kompania Rajonale e Ujësjellësit “Prishtina” do të ndërmarrë aksion për shkyçje në tri objekte banesore në Prishtinë. (Nisja e organizuar nga objekti i KRU “Prishtina”, Emshir, ora 10:30)

- Mbahet mbledhja e Kryesisë së Kuvendit të Republikës së Kosovës. (Ndërtesa e Kuvendit, salla salla C 301, ora 11:00)

- Ministrja e Drejtësisë, Albulena Haxhiu, raporton në Komisionin për Integrim Evropian. (Ndërtesa e Kuvendit, salla N302, ora 11:00)

- Komisioni për Mbikëqyrjen e Financave Publike shqyrton Raportin e auditimit për pasqyrat vjetore financiare, të Institucionit të Avokatit të Popullit për vitin 2022. (Ndërtesa e Kuvendit, salla N302, ora 11:30)

- Promovohet libri "E vërteta e aktorit" e autorit Naim Berisha. (Amfiteatri i Bibliotekes Kombëtare, ora 12:00)

- Kryetari i Lidhjes Demokratike të Kosovës, Lumir Abdixhiku, mban konferencë për medie lidhur me situatën aktuale në veri. (Selia e LDK-së te Qafa, ora 13:30)